《如水》Vol. 12 編委答（二）：鄺頌晴

編按﹕《如水》每期均會邀請讀者向編委直接發問各種問題。收集問題後，編輯部將加以整理，並轉交編委回應。任何人士均可發問，有意者可按此。

讀者：勇武在外，除咗出席集會，可有用武之地？眼見集會人數愈來愈少，如何調整心態？海外地區組織欲找大機構合作，往往感到「大台」架子再現，屢次碰壁，如何可使各位通力合作？

鄺頌晴：你對勇武嘅定義，或者你對勇武嘅理解係啲乜嘢？因為我哋一開始點解會有所謂勇武派，唔係因為我哋為咗「衝」而成為勇武，而係因為我哋之前用過和平抗爭嘅方法都未能達到我哋想要嘅目的，所以我哋先去嘗試一啲新嘅方法，例如勇武抗爭、以武制暴。當初我哋係唔想畀和理非非嘅教條捆綁，而係去做有用嘅嘢，所謂勇武派嘅概念先應運而生。所以你問「勇武晌外國有冇用」，但我覺得要思考嘅係而家有咩係有用？你想見到嘅效果係乜？

好現實咁講，勇武抗爭嘅手段晌外國嘅情況下未必啱用。因為我哋對抗緊或者要處理嘅問題好少係直接來自中國、或者香港政府，更多嘅係所在地對中國嘅政策、中國嘅滲透。亦都因為所在地方嘅法例、制度，好少係不公義至一個程度，使至我哋要進行公民抗命、以武力回應，所以為正義必要時犯法抗爭晌外國未必適用。

我唔會話出席集會冇用，但有用嘅嘢仲有好多。如果你晌英國，你登記咗做選民未？有冇參與地區政治？有冇同壓力團體（在此指非香港人組織）溝通？甚至加入壓力團體？呢啲都係我工作裡面見過對於改變政策相當有用嘅方法。

至於集會人數愈來愈少，我覺得係作為流亡群體好容易出現嘅情況。如果你社運 CV 有啲厚度，相信你都會記得一二年開始，關於係咪要行禮如儀地集會嘅討論記憶猶新，呢個亦都係反抗「大台」嘅開始。我覺得我哋要思考嘅係集會到底有咩目的，到底係唔好忘記一啲事情、行禮如儀、為做而做、定係我哋有一啲行動想一齊做？當你諗好集會嘅目的到底係乜嘢，再去睇吓你出席嘅集會到底有冇達到嗰個目的。舉例：一個集會可以係達到令大家嘅情緒有一個出口嘅目的，而你去完呢個集會有舒服啲嘅話，咁呢個集會嘅目的就算達成。

至於你講關於有「大台」，以及難以合作嘅問題，呢個係社運嘅千年難題。一樣米養百樣人，人同人之間一定有好多磨擦同埋不滿，尤其係經歷咗一大堆大型創傷事件之後，大家都好著緊香港，就更加容易有相處唔到嘅情況。我嘅經驗入面，最能解決到呢個問題嘅方法有兩個：

第一，就係去認識一個人。當你真係有同一個人接觸過，有一齊經歷過一啲事，你就會對呢個人多咗認知，亦都更加瞭解佢嘅為人處事，誤會難啲發生，亦都會多啲信任。

第二，就係搵啲嘢一齊做。當你哋一齊有一個共同嘅目標，有一件事共同想做，例如一個 campaign、舉辦一個集會、推動一啲政策，只要你哋一齊有啲嘢做，你哋就會產生某程度上嘅革命情感，令到你哋更加容易合作。

另外，一個心態上可以幫到你嘅諗法或者係當呢個係一份工咁處理，做好件事就夠，唔需要諗要同人相處得好好或者交朋友交心，可能會容易啲。你返工返學，都未必係同每一個人都相處到、合作到，社會運動都係一樣，好正常。