美麗新香港
有人認為「光復香港」係要重回舊香港，或某個政權恢復對香港嘅管治。筆者相信主權在民，過往看似真實嘅香港都只係殖民統治下嘅虛像。「光復香港」應該係香港人恢復對主權嘅行使，驅走殖民統治嘅昏暗，迎來主權在民嘅榮光；而「時代革命」係由下而上將舊有事物推倒重來，經歷死亡後浴火重生，開創屬於香港人嘅全新時代。故此，筆者心目中理想嘅香港只會喺未來出現。下文將會破除對舊香港嚮往，從中建構對美麗新香港嘅想像。筆者認為光復後嘅新香港必須具備以下四大元素：自由、平等、尊嚴、博愛。
自由
八十年代嘅香港被稱為黃金時代。獅子山精神教我哋要拼搏向上，重視個人名利，忽視精神價值嘅追求，於是社會就培養出一班對政治漠不關心嘅經濟動物。喺繁華盛世下，香港人習慣被圈養嘅安穩生活，忘記咗追求自由嘅本能；擁抱空洞嘅經濟自由，卻缺少主動爭取政治權利嘅能力。當前途談判傾得如火如荼，香港人卻沉醉於物質消費，放棄爭取自決前途嘅機會，最後換來一國兩制嘅惡夢。只顧眼前享受，甘願做殖民政權下嘅奴隸，連下一代嘅未來都唔識去爭取，呢個就係上一代心目中最美好嘅香港？
香港人爭取自由嘅想像，往往停留於唔想要啲乜，例如送中條例、警暴濫權。彷彿只要回到英殖時代相對開放嘅管治，就會擁有自由。歷經百年殖民統治嘅香港人，就好似被困喺籠入面太耐嘅雀仔，就算唔再受到拘束，都可能唔再識飛。即使擺脫外在嘅限制，都唔代表具備飛翔嘅能力。自由唔會隨著暴政倒台而降臨，真正嘅自由在於香港人能否做自己嘅主人。
光復後嘅新香港必須具備積極、自由嘅土壤，讓香港人擁有實踐自我嘅能力。政治制度方面，必須體現主權在民，開放俾人民參與施政。經濟發展方面，唔再依賴金融、旅遊，鼓勵創新同多元產業。教育制度方面，摒棄填鴨式教育，鼓勵下一代按潛能各展所長。社會風氣方面，唔再用金錢物質去定義人嘅價值，多啲重視人文價值。每個香港人都可以做自己嘅主人，喺呢片土地上追逐夢想，無拘無束地自由飛翔。
平等
有人覺得舊時嘅香港係一個相對平等嘅社會，因為喺遍地黃金嘅年代，每個人都有平等嘅機會；只要肯努力拼搏，就可以向上流。上咗岸嘅香港人會認為，社會不公係源於某啲人唔願努力。所以佢地會睇唔起競爭下嘅失敗者，指責買唔到樓嘅年輕人係廢青，但卻對資本家嘅惡行視若無睹。今日大家會一廂情願咁當李嘉誠係同路人，殊不知資本家係導致社會不公嘅元兇。國安法未必會打壓晒所有人，但地產霸權帶來嘅壓迫卻無遠弗屆。就算香港脫離中共管治，如果社會都係充滿歧視，樓價都係咁高，呢個會係大家心目中理想嘅香港嗎？
香港作為一個資本主義嘅天堂，依賴市場機制去解決分配問題，崇尚競爭而忽視平等原則。今時今日香港人所關注嘅都只係政治平等，甚少談及社會階級之間嘅差異。掃除中共外敵之後，香港仍然可以係一個不平等嘅社會，我哋仍然有好多內部矛盾需要處理，特別係階級矛盾。
光復後嘅新香港唔單止要保障政治平等，更要促進經濟平等。除咗有平等投票權，社會福利亦要照顧弱勢社群嘅需要，達致分配正義。人皆生而平等，社會內要盡可能消除各類型歧視，包括種族、階級、性別、信仰、性取向等等。過去嘅日子，香港人一直活喺對立同撕裂當中，只有平等地互相看待對方，香港呢個地方先會成為一個令人心安嘅家邦。
尊嚴
有人覺得以前香港人活得比較有尊嚴，因為相比鄰國仍在受苦嘅人，我哋過著物質富裕嘅生活，唔洗為三餐憂愁。喺香港文化最輝煌嘅年代，港產片、粵語流行曲揚威海外，贏得國際肯定。香港人作為文明嘅華人嘅象徵，受到世人認識同尊重。
香港一直喺大國夾縫間掙扎求存，當香港人嘅尊嚴不斷被踐踏，我哋就只能啞忍或乞求別國援助。或者昔日嘅榮光能夠蓋過被殖民嘅事實，但始終香港人嘅尊嚴被殖民者掌握，隨時都可以被剝奪。當殖民者不再施捨，香港人就會淪為今日極權下嘅蟻民。事到如今，仍有人希望香港重回英殖管治，亦有人提出喺海外建立新香港，以特設城市嘅方式寄人籬下，不斷出賣尊嚴去換得一夕安寢，忘記咗作為呢片土地嘅主人應有嘅尊嚴。
光復後嘅新香港必須係一個主權國家，只有主權國家先能夠保障人民嘅尊嚴。即使人權係普世價值，如果冇國際地位作依靠，一切都只係空談。當香港能夠以主權國家嘅身份與世界各國平起平坐，我哋先能夠做堂堂正正做香港人。正如台灣抗爭烈士鄭南榕所講：「雖然我哋係小國小民，但我哋都係好國好民。」香港人要得世人尊重，唔需要好似中國人咁財大氣粗，亦唔一定要有驕人嘅成就。只要香港人能夠當家作主，我哋就自有一套去立足世界，唔一定大富大貴，但一定活得有尊嚴。
博愛
早期嘅香港人大多係經濟移民，走難到香港只為改善物質生活。華人社會重視家庭觀念，香港人以家庭作為資源分配單位，一心為咗賺錢養家，形成「搵食至上」嘅功利家庭主義。於是對社會事務漠不關心，對公民社會缺乏信任，最後變成今日嘅「港豬」。從來都唔會講「博愛」，只會講「各家自掃門前雪」。
歷史將香港形容為「借來嘅地方，借來嘅時間」，上一代香港人並冇真正視香港為家，只係以過客嘅心態寄居，一有事就移民逃避。如果香港人對呢片土地缺乏熱愛，香港永遠只會係一座浮城；昔日用血汗灌溉出嚟嘅民主果實，終有一日會枯萎喺香港人嘅冷漠之中。光復後嘅新香港係一個博愛嘅社會，除咗要有對身邊人嘅愛，仲要有對呢片土地嘅愛。香港人要擺脫功利家庭主義，委身於公民社會之中，維繫共同體之間嘅連繫同信任，延續共同生活嘅意志；重視孕育我哋成長嘅祖地，唔需要愛國洗腦教育，都會甘願為香港付出,珍惜得來不易嘅民主，視香港為安身立命之地，繼續書寫香港嘅故事。
以抗爭作見證
可能你會覺得呢個理想中嘅香港，只係存在於虛幻嘅烏托邦,現實中根本冇可能實現。但其實你同我都曾經喺抗爭中，見證過美麗嘅新香港：自由，我哋自願走上街頭，主動地爭取應有嘅自由，同時喺抗爭過程中實踐自由。平等，喺面罩底下你我不分年齡、性別、種族、階級，所有香港人都平等地視為手足。尊嚴，香港人嘅抗爭已經向世界展示，我哋唔係甘願屈服於強權下嘅奴隸，而係活得有尊嚴嘅鬥士。博愛，我哋好愛呢個地方同呢度嘅人，喺抗爭中盡顯互助互愛，一個都不能少。
猶太教徒相信聖經中被應許嘅流奶與蜜之地，信仰嘅預言描繪咗佢哋心目中理想嘅以色列。筆者並冇宗教信仰，但我係香港嘅信徒，新香港嘅預言將會由每一個相信香港嘅手足去書寫。米蘭昆德拉喺《笑忘書》中講過：「人終須一死，但人理所當然咁覺得，佢嘅民族有一種永恆嘅生命。」民族、信仰、神話都係代表一種永恆，或者我哋有生之年見證唔到美麗新香港嘅誕生，但只要仍有香港人繼續想像，歷史將會記錄香港人喺煲底除罩相擁嘅一刻。
See! How desperate is our home.
Mark! How barren lies our land.
Still, with faith I keep my sacred vow:
Here with you I stand.
When all is done, our promised land.
Shall see new petals fly,
New paths we forge with scarred hands
Beneath this chainless sky.
« New Paths We Forge» DGX Music
願香港民族能夠到達應許之地，見證民主嘅花瓣散飛，抹去過去苦難嘅傷痕，喺維港無盡嘅天空下，建立美麗嘅新香港。
