《如水》第十期編委答（二）

（編按﹕《如水》每期均會邀請讀者向編委直接發問各種問題。收集問題後，編輯部將加以整理，並轉交編委回應。任何人士均可發問，有意者可按此。）

讀者：我係一個喺香港讀緊書嘅大學生，但完全睇唔到香港發展事業嘅將來，例如我有專業技能，或者躺平做基層職位，兩樣都睇唔到將來咁。

發展專業服務或高科技嘢零空間配套支援。做基層行業隨時係窮忙族／月光族。

想問香港未來仲會唔會有可能繼續任何發展？

（e.g.：發展事業／組織家庭等等）

‬式：各行各業情況有所不同，而每個人嘅需求同理想亦不一樣，所以老實講，真係好難一概而論。亦因為咁，我認為不論係一味勸留定係一味勸走，都係不負責任的。

單從教育來講，作為一個喺香港讀 bachelor 但之後亦有分別喺英美留過學嘅人，我的確係認為國外某啲機構能畀到比香港嚴謹得多嘅訓練。但掉返轉來講，亦有不少去咗英國嘅朋友，發現當地人工遠比香港低，只係能勉強應對租金同生活費，真係 paycheck to paycheck。所以真係好睇你係攞香港同邊喥比，同埋你想做乜。

不過，對非流亡嘅香港人來講，其實留或者走並唔係一個咁斬釘截鐵嘅決定：有唔少朋友來咗英美好幾年，最後都係決定返去香港發展，更有唔少朋友周不時兩邊走。如果資源同能力許可，我會建議出來試一兩年，master 又好，打份工又好，自己親身體驗一下唔同地方嘅工作情況，同認識吓當地嘅政經體制，再決定喺邊喥發展，都不失為一個做法。

你提到嘅問題係香港喺 2019 年之前，過去二三十年一直面對緊嘅問題：對新興行業支援唔夠，對基層市民亦保障唔足。呢啲亦唔係香港獨有嘅問題，雖然美國喺工作上嘅支援同配套大體來講係比較好，但係唔少城市嘅基建都千瘡百孔，而佢嘅醫療同教育制度亦對基層同中產唔友善。你如果問我，美國係咪一個組織家庭嘅好地方，老實講我都會有保留。當然，呢啲條件唔係一成不變，但亦不易改變：喺美國有身分嘅人可以用選票甚或抗爭嘗試改變社會，但其兩極化嘅政治亦令好多根本嘅問題無從解決。國安法下嘅香港，固然制肘處處，但 2021 年 deliveroo 外送員依然成功組織罷工，證明並非毫無抗爭空間可言。我哋固然可以揀喺邊喥發展，但最後嗰個地方變成點，it is still up to us。