《如水》第八期編委答（二）

（編按﹕《如水》每期均會邀請讀者向編委直接發問各種問題。收集問題後，編輯部將加以整理，並轉交編委回應。任何人士均可發問，有意者可按此。）

讀者：滑鼠娘娘妳好，我在本土派興起的時代已經開始關注妳，覺得妳做的事情很了不起，謝謝妳的努力﹗那麼現在香港與五年前已經有很大的不同，請問妳現在回望，怎樣看當時「熱狗」的自己？

鄺頌晴：多謝你嘅讚賞，都多謝你一直關注我做嘅事。

雖然每次回望我都會 cringe 到打冷震，覺得冇眼睇嗰陣時嘅自己，但我會話「冇嗰個時期嘅自己就冇而家嘅我」。

咁講好似好老套，但做「熱狗」嗰段時間除左一堆不堪回首嘅舊照之外，仲畀左好多諗法同觀察我，對我之後嘅工作同做人處世都有好大影響。例如社會運動中永遠都會有「激進 vs 溫和」，而兩者未必調和到；作為有光環同話語權嘅人，點樣去接受其他參與者未必接受你、認同你、甚至討厭你，同時又點樣唔好騎劫佢哋同點樣可以畀個平台佢代表佢自己，而又保持到心理平衡唔妒忌唔感覺被冒犯；點樣晌大型社會運動後處理自己情緒；唔好將一啲分歧變成私怨，仲有好多自己修養上嘅課題，都係晌嗰個時候開始學。

有朋友成日笑我要做 IQ test 睇下自己當時點解咁樣樣，我有時都覺得尷尬，會介意人哋咁講，我係咪一世晌人哋眼中都只會係「前熱狗」。不過如果唔係曾經係熱狗，所以一六年選舉後作為反骨女被清算，之後有好多際遇都唔會發生，最起碼應該會拍少次拖分少次手，之後就唔會出國讀書，就唔會有機緣參與國際線，而家就唔會晌 IPAC 返工做政策倡議。所以滑鼠娘娘個 package 包埋前熱狗呢樣先成立。

以前有好多嘢都做得唔好，人又難搞又自尊心脆弱，又做埋啲痴線決定成日撞板，成日諗起都想鏈死細個嘅自己。但有時候我又覺得，傻事唔係細個做唔通一把年紀先做，同埋我而家都算正正常常一表人才（？）吖，所以就算啦。

Taylor Swift 話 Cringe is unavoidable over a lifetime and we have to learn to live with cringe，我諗做過熱狗嘅自己就係最好嘅學習環境了。