《如水》第七期編委答（二）

（編按﹕《如水》每期均會邀請讀者向編委直接發問各種問題。收集問題後，編輯部將加以整理，並轉交編委回應。任何人士均可發問，有意者可按此。）

讀者：

想問點先可以適應到流亡後的生活，每一天營營役役，我唔再喺前線，返到一個較為平靜嘅生活，點先可以好好生活，因為我唔似其他人成日參加集會，或者其他活動，甚至乎有啲抗拒。好似有啲刻意斷開？我都唔知道。

如水編委 — 鄺頌晴：

坦白講，我自己去到呢一刻都係未「適應」到流亡嘅生活。

當你响一個地方生活咗二十幾年，對佢有好深嘅情感嘅話，其實唔會用幾年時間就可以改變到自己嘅習慣、胃口同埋心態。我到今日仍然會因為好想食米線、好想食砵仔糕但食唔到所以好唔開心，會偷偷地喊。掛住習慣同響香港嘅嗰種生活簡直就係更加難受。

當日經歷過咁震撼同創傷嘅社會運動，要進入日常返工返學，甚至喺無嘢做嘅日子其實好困難。人響外國，有時感覺係平行時空，你屋企著咗火年輕人要考慮嘅係流亡，但呢個地方嘅人要思考嘅係聽日買咩衫、同朋友去邊度玩。我自己同外國朋友有時都會有話不投機嘅感覺，覺得無人明白。

同一時間，唔想參與集會或者其他活動其實都係好正常。不停去重新諗起當時發生過咩事，可以係非常痛苦。我自己係連關於 2019 年嘅電影都唔敢睇，只係因為工作關係先睇過兩套，之後成個星期都好唔開心係咁喊。所以如果你唔舒服或者抗拒，其實都好正常。「人冇事先可以做世界冠軍」，希望你會先照顧自己嘅情緒。

我自己係每個星期都有睇 Therapy 處理情緒，真係幫到我好多，可能你係要先休息下避開下，可能係行下公園去下大自然。同埋「適應」唔係一件可以「趕進度」嘅事，係需要好多好多時間，知道自己仲係不適，畀啲時間自己去習慣。我哋失去咗嘅嘢係好大好大的，可能要好多時間先會慢慢好受啲。

讀者：

謝回答，祝各位生活安好。