《如水》第十一期編委答

（編按﹕《如水》每期均會邀請讀者向編委直接發問各種問題。收集問題後，編輯部將加以整理，並轉交編委回應。任何人士均可發問，有意者可按此。）

讀者：我知可能有啲政治潔癖，但有時我會好抗拒做任何同香港相關的事嘅時候獲得實際利益，尤其係個利益係來自香港內部社群。我覺得咁樣好似變咗靠售賣政治理念搵食咁。我認為香港人應該賺商業社會嘅錢（最好係大陸錢），來養香港政治議題。所謂「食窮民建聯，票投⋯⋯」。你哋覺得我咁諗有無錯？

鄺頌晴：作為依家全職收錢返工嘅香港倡議統籌，我唔覺得你有錯。從事社運嘅頭 8、9 年，我都係冇收錢的，一來仲係學生可以投放的時間多，另一方面係當時冇資源出糧畀任何人。去到大個啲有返過公民組織的兼職，當時開始有因為「做香港議題」得到的實際利益，然後輾轉搵到依家份全職。

我對願意無償做嘢嘅人非常敬佩同感激。因為佢哋真係燃燒生命去做香港嘅嘢。要放工仲有心力、時間做香港嘢係好難的。

有啲好奇你指嘅實際利益係指金錢定係其他嘢。因為做社運，會帶來的「附加利益」都可以好多——名氣、社會資本，或者例如因為你有啲名氣，會有人晌茶餐廳幫你埋單，又可能因為你有人識，所以有人租屋畀你平咗幾千蚊，呢啲又係唔係實際利益呢？ 

至於應唔應該，我覺得好睇你本身點睇你從事嘅係乜嘢。依家返工，係用我嘅時間、專業同經驗，換取金錢嘅回報去交租同買罐罐。我有冇賣政治理念搵食呢？有，如果唔係過去 10 年我晌香港社運嘅經驗，同讀緊個 PhD，我唔會搵到份工，就冇可能幫公司嘅各位議員做香港 campaign。但我冇覺得自己唔道德或者有做錯，而且全職令我更加專心做好相關嘅嘢，唔使擔心其他。

「君子謀道不謀食，君子憂道不憂貧。」唔係指君子唔使食飯，而係指做人應該思考個「道（呢個討論下為『光復香港』）」 ，唔係純粹想賺錢。如果用社運搵食，消費議題，食「人血饅頭」，咁當然唔可取。但如果係當成一份工，認真做去達到光復香港嘅目標，我覺得可以。但條線係好難拿捏的，好睇個人修為同把唔把持得住。

社運唔係一個 business model，佢本質上唔係為咗賺錢。從好商業嘅角度睇，社運係唔會為你創造價值，畀錢社會運動本質上就係同倒落鹹水海冇分別。但社會運動的確需要錢。所以你講嘅「食窮民建聯」其實好啱—塘水滾塘魚嘅做法係好難持續的。甚至係有 funding 都好，你都需要不斷交數，證明自己有存在價值先可能一直有錢。

至於賺乜錢，只要冇直接、間接參與違反人權嘅事，賺乜錢我都覺得可以。不過同中國相關嘅利益，好少係乾淨的。

講到尾，我覺得你自己舒服就好。又，之前睇咗本書，叫《金錢的另一端是「人」》，本書係咁寫的：「金錢的背後必然有『人』，有著為你勞動、使你幸福的人。」我覺得睇完有令我對「返社運工」有另一種睇法，得閒可以揭下。