去或留

「咁耐無見，出嚟食餐飯／出嚟見下面？」「影張相吖，下次都唔知幾時再見。」「有無諗住移民呀？去邊度會好啲？」呢幾句對白，係我臨走前係聚會中講得最多。每次講完，心入面都會嘆口氣，因為知道好快就要同親朋好友經歷生離死別中嘅「生離 」。

面對香港政局上同社會發展上進退兩難嘅窘境，我認為討論「 去或留」嘅價值，一定係建立於對象係同路人嘅基礎上。即係去同留嘅人，等於合作開一間公司，有共同理念同目標，做咩行動都以公司利益為依歸，而合作中所產生嘅摩擦或行動效益上嘅比較，或者就係現時最尖銳嘅矛盾所在——因過去抗爭受牢獄之苦嘅留港手足，與嘗試新發展但暫時未有成果嘅海外戰線。

要牢牢記住，矛盾與對立是不同的。矛盾仲係以相同目標做事，對立就已經係以相反目標行事。要成功，就必需容納有矛盾嘅伙伴同認清對立的人。要時常反覆思量問題源頭，並不是與你產生矛盾嘅同事，而係要你公司清盤嘅政權。

時常話，要對準政權，就係要將抗爭運動放喺政權嘅弱點上，以下係我認為後國安法嘅香港，去同留都仲可產生作用既抗爭運動。

留嘅戰線，當然比以往更少選項，需由直接參與抗爭（ 示威同投票）轉為間接嘅不合作運動。加強不合作運動而又不會違法，係困難所在，但亦都可能對政府有制衡作用。政府需要稅收先可運作，而消費自由就係武器，假如留嘅人集中支持有良心嘅企業同公司，對方嘅受眾數目永遠不達標，長遠發展落去，建制中嘅行業領袖或企業好快就會成為磨心，為咗要生存，建制中自然會要求政府妥協，而呢種間接嘅制衡係絕對可以擴展至每個行業的。維持呢種不合作運動嘅好處，就係接近唔需要政治宣傳，而人人都可以隨時參與，最重要係運動嘅力度係同社會不滿成正比，越唔合作政府就越會被建制力量要求妥協，當各行各業都需向社會力量妥協，這絕對是抗爭運動嘅小勝利。

去嘅戰線，難度係創立新抗爭土壤，前路被無法估計，成果亦然。抗爭力量被分散至不同國家，係不爭嘅事實，但同時亦有更大機會令更多地方向政權施壓，都有可能增強制衡極權政府嘅作用，我認為這是海外戰線嘅主要目標。長遠來講，每年有紀念性嘅日子，都可透過海外集會而得到國際媒體報導及關注，令各國政府定時了解香港最新局勢發展，避免走入新疆維吾爾族被忽視嘅困境，這是對香港有關鍵性嘅幫助的。此外，利用外國突破性嘅科技發展，為香港逐漸下降嘅新聞自由和資訊流通性作出準備，都係海外戰線重要嘅任務。舉例講，谷歌全球 Wi-Fi 技術及虛擬貨幣，很大機會可以成為對抗極權打壓嘅工具。

去或留嘅戰線，各有難度，抗爭運動嘅時間越長，就可能會有伙伴量度抗爭成果。我認為，檢討戰線成效係需要的，不過，否定或攻擊成效低嘅戰線，這絕對是不可能被接受的，即使有伙伴的不滿是情有可原。問題係如何處理矛盾，找出雙贏局面或作出妥協，先係成熟嘅抗爭運動。呢個亦係民主制度必然發生嘅事，無需放大，同時都無需隱瞞。

對於窮追猛打嘅挖苦、攻擊和否定——經歷過 2019 年抗爭嘅同路人，大概都知道極權政府嘅套路，不用詳細解釋。因此，以往可能會作出激烈嘅回應，取而代之，現在就會先辨別出言論嘅動機。另外，如果真係伙伴對去或留表達不滿，討論和保持溝通即係必要嘅基礎，而真正追求民主嘅人，通常都較可作出理性分析。同時，可認清不同戰線實際上沒有互相削弱力量，反而，假如一面倒去或留，都將得唔到同「有留有去」相同嘅抗爭力量。比如話，全部人都留低，政權一限制新聞同資訊自由，香港好可能無國際社會嘅關注，咁樣係加速極權國家嘅控制；相反，大部分人移民，無人進行不合作運動，結果都係加大新移民湧入嘅機會，香港就更快淪陷。

實際上，去或留，都唔係想做就做到。我相信唔少想走嘅人，都有各自嘅原因要留低，家人、伴侶、子女、工作、經濟問題、性格、身體毛病、語言、生活習慣等等，反之亦然。所以要討論嘅唔係應該留或走，而係你呢一刻留低，就盡力做留低可做嘅抗爭，走到嘅人，就一定要保持初衷，做好國際戰線，出席海外集會係基本要做嘅事。

無論去或留，我認為都要有將香港人呢個身份傳承至下一代嘅準備。參與抗爭，就應該知道必定有成功或失敗，成功當然可以係香港延續身份，失敗就要係外國傳承落去，用任何方法都要做得到，先至係真正永續香港人嘅抗爭運動。

光復香港不是夢，是意志，是傳承。

峰琦

二零二一年六月七日