反移民潮湧至世界角落 澳洲港人能否倖存？
自《國安法》橫空出世，香港人紛紛執晒包袱，陸續走難到世界各地。根據最新中文大學嘅民調，2024 年港人首選移民目的地，已由英國變成澳洲。的確，隨住加拿大 Stream B 落閘， 冇 BNO 嘅年輕一代想搭上救生艇，自不然會考慮澳洲嘅 Hong Kong Pathway。
但係，後疫情時代，反移民嘅浪潮都湧至位處世界角落嘅澳洲，準備出發嘅港人又有冇留意？
美國反移民潮波及澳洲政壇
身處澳洲，筆者深切體會到，澳洲同美國，呢對「兄弟之邦」，原來係親生嘅！單睇市面，澳洲各大城市都染上美利堅色彩：無論係住宅建築、駕駛文化、甚至快餐品牌，無不滲滴美國文化。
到咗美國大選，澳洲傳媒嘅鎂光燈亦隨之轉向，當勞侵（Donald Trump）嘅一條 Tweet，賀錦麗嘅每個回應，都足以霸佔澳洲大小報章頭條，本地新聞反而變成花邊小事。雖然澳洲人冇票，但都經常因大選熱烈討論，彷彿選緊嘅唔係美國總統，而係澳洲總理。
舊年筆者曾參與遊說團，踏足坎培拉國會大樓，更深深感受到澳洲政壇對美國政治嘅着迷。自由派議員將美國前總統列根海報，擺喺寫字樓最當眼位置，將其奉為精神導師；左翼議員門口掛住嘅海報，不乏 LGBTQ+、綠色政策等美國進步派議程。
選戰風格上，澳洲政黨都傾向美式嘅負面選戰（Negative Campaigning）同攻擊性廣告（Attack Ads）。在朝在野，無論左右，或多或少都受到美國政治氣候感染，亦樂於利用呢股政治狂熱。
